АИ-92-ыг ОХУ-аас тогтмол захиалж, хангамжийг тасалдуулахгүй байхаар тогтлоо

Аж үйлдвэр, эрдэс баялгийн яамнаас газрын тосны бүтээгдэхүүний нэгдсэн мэдээллийг 2026 оны нэгдүгээр сарын 5-ны өдрийн байдлаар танилцууллаа. Тодруулбал, Улаанбаатар төмөр зам дээр шатахуунтай 853 вагон байгаа бөгөөд АИ-92 автобензин 215 вагон буюу 12900 тонн, АИ-95 автобензин дөрвөн вагон буюу 240 тонн, дизель түлш нь 532 вагон буюу 31920 тонн, ТС-1 онгоцны түлш 33 вагон буюу 1980 тонн болон бусад бүтээгдэхүүн 69 вагон тус тус байгаа аж. Он гарснаар эхний таван өдөрт нийт 15513 тонн АИ-92 автобензин, 19312 тонн дизель түлш тус тус орж ирээд байна. Түүнчлэн, Сүхбаатар боомтоор 181 вагон буюу 11013 тонн АИ-92 автобензин, 312 вагон буюу 19312 тонн дизель түлш, Замын-Үүд боомтоор 75 вагон буюу 4500 тонн АИ-92 автобензин тус тус орж иржээ.

Сүхбаатар өртөөнд 15 вагон, Сайншанд өртөөнд 38 вагон дизель түлш тус тус байгаа бол буух өртөөдийг чиглэсэн замд 70 вагон АИ-92 автобензин, 232 вагон дизель түлш явж байна.

Газрын тосны бүтээгдэхүүний хангамж, үнийг тогтворжуулах, зохион байгуулах, хяналт тавих үүрэг бүхий төр, хувийн хэвшил, иргэний нийгмийн хамтарсан зөвлөл 2026 оны нэгдүгээр сарын 5-ны өдөр хуралдаж, шатахууны үнэ хангамжийн асуудал тэр дундаа АИ-92 төрлийн К2 автобензиний үнийн асуудлыг хэлэлцлээ. Хуралдаанаар хамтарсан зөвлөлийн гишүүдийн саналыг нэгтгэн, дараах зөвлөмжийг гаргахаар тогтов. Үүнд,

• АИ-92 төрлийн К2 автобензиний үнийг нэмэхгүй байх зөвлөмжийг бүх шатахуун импортлогч, түгээгч аж ахуйн нэгжүүд хэрэгжүүлж ажиллах

• АИ-92 автобензинийг ОХУ-аас тогтмол захиалж, хангамжийг тасалдуулахгүй байх

• Газрын тосны бүтээгдэхүүний нөөц, хангамжийн нэгдсэн цахим систем бий болгох, урсгал зардлыг бууруулах, хэмжээг аудитаар баталгаажуулах зэрэгт талууд хамтран ажиллах

• Бусад төрлийн шатахууны хувьд олон улсын зах зээлийн үнэд суурилсан уян хатан үнийн бодлогыг хэрэгжүүлэх нөхцөлийг бүрдүүлж ажиллахаар шийдвэрлэв.